<$BlogRSDUrl$>
Tamil Blogs Wiki

Tamil Bloggers Database

Enter Record

View/ Search

Saturday, February 28, 2004

சிற்றிதழ் சேகரிப்பு - தமிழம்

 

சிற்றிதழ் சேகரிப்பில் பல்லாண்டுகளாய் ஈடுபட்டுவரும் "தமிழம்" குழுவினரினைப் பற்றி பாரி எழுதியிருந்தார் .. அதைப் படிக்கும்போது மிக ஆச்சரியமாக இருந்தது ... கிட்டத்தட்ட 30 ஆண்டுகளாய் வரும் அனைத்துச் சிற்றிதழ்களும் தொகுக்கப்பட்டுள்ளன என்று அக்குழுவினர் சொல்லியிருக்கிறார்கள்.. 200 சிற்றிதழ்கள் முதல் இதழிலிருந்து இன்றைய இதழ்வரை முழுவதுமாய்த் தொகுக்கப்பட்டுள்ளதாய்த் தெரிவித்துள்ளார்கள் .. 2500 -க்கும் மேற்பட்ட வகையான சிற்றிதழ்கள் இதுவரை சேகரித்து வைக்கப்பட்டுள்ளதாய்க் கேள்விப்படும்போது பிரமிப்பு ஏற்படுவதைத் தவிர்க்க இயலவில்லை ... மாத மாதம் 100 -க்கும் மேற்பட்ட சிற்றிதழ்கள் அவர்களின் நூலகத்திற்கு வருகிறதாம் .. சில தரமான சிற்றிதழ்கள் பாதியிலேயே நின்று விடுவதைப்பற்றியும் இக்குழுவினர் கவலை தெரிவித்திருக்கிறார்கள் ... ஆனாலும் வெளிவந்த அக்குறுகிய காலத்தில் அச்சிற்றிதழ்கள் ஏற்படுத்திய தாக்கம் பற்றிப் பெருமையுடன் சொல்லியிருக்கிறார்கள்.. வெல்க அக்குழுவினரின் முயற்சி .. வாழ்க அவர்களின் தொண்டு ..

Friday, February 27, 2004

பிளாக் ஸ்பாட் டவுன்லோட் பிரச்சனை ... !

 

பிளாக் ஸ்பாட்டில் கணக்கு வைத்திருப்பவர்களுக்கு சில(பல) சமயம் ஒரு பிரச்சனை இருந்து வந்தது .. முதல் பக்கம் முழுவதும் சரியாக இறங்குவதில்லை .. பாதி இறங்கி மீதி அப்படியே நின்றுவிடும் .. பக்கம் முழுவதையும் சரியாகப் பார்க்கப் பல முறை மீளேற்றம் செய்யவேண்டியிருந்தது ... போன வாரம் என்னுடைய வலைப்பூ முழுவதும் இறங்க ரொம்பவே கஷ்டப்பட்டது . "பிளாக் ஸ்பாட்" நிறுவனத்தாரிடம் கேட்டதற்குப இவ்வாறு பதில் சொல்லியிருக்கிறார்கள் ..

" .. இந்தப் பிரச்சனை பலருக்கு இருப்பதை நாங்கள் ஏற்கனவே அறிவோம் ... அதைச் சரிசெய்ய முயன்று வருகிறோம்.. இப்போதைக்கு உங்களின் பிரச்சனையைச் சரி செய்துவிட்டோம் .... உங்களின் வலைப்பூவின் டெம்ப்ளேட்



இப்படி ஆரம்பித்ததை பழையபடி சாதாரணமாக என்று ஆரம்பிக்குமாறு மாற்றியிருக்கிறோம் .. மேலேயுள்ள வரிகளில்தான் இண்டெர்நெட் எக்ஸ்ப்ளோரரில் நீங்கள் குறிப்பிட்ட பிரச்சனையை ஏற்படுத்தும் " bug " உள்ளது என்று தீர்மானித்திருக்கிறோம் .. இனிமேல் உங்களுக்கு இப்பிரச்சினை வராது என்று நம்புகிறோம் .. "

இப்படிச் சொல்லியிருக்கிறார்கள் ... அவர்கள் சொன்னதுபோல் திரும்பவும் இதுவரை எனக்கு இந்தப் பிரச்சினை வரவில்லை .. "...இந்த யோசனையை என் நண்பர்களுக்கும் சொல்லலாமா என்று நினைக்கிறேன்..." என்று அவர்களுக்கு இன்று மீண்டும் எழுதியதற்கு இன்னும் அவர்களிடம் இருந்து பதில் வரவில்லை.



வெண்பனி விழும் நேரம் .. !!

 
இன்றைக்குக் காலையில் கண்டவுடன் கிளிக்கியது ..


Thursday, February 26, 2004

மனிதர்கள் பல விதம் ...

 

எத்தனை யுகத்துக்கு இன்னும் திருக்குறளை வைத்துக் கழுத்தை அறுக்கப் போகிறார்களோ என்று யாராவது மனதில் நினைப்பார்களோ என்று போன பதிவைப் பதியும்போதே மனதில் ஒரு எண்ணம்... அதேபோல் அப்பதிவுக்கு இன்று முகம் காட்டாமல் ஒருவர் அப்படியே எழுதிய பதிலைப் பார்த்தேன் .. அதைப் படித்ததில் இருந்து ஒரு பத்து நிமிடத்துக்கு என்னால் சிரிப்பை அடக்கமுடியவில்லை .. பக்கத்தில் இருந்த நண்பர்கள் ஒரு மாதிரியாய்ப் பார்த்ததால் கஷ்டப்பட்டு அடக்க வேண்டியதாகிவிட்டது ... "எழுத்துக்கள் அகரத்தில் ஆரம்பிக்கிறது" என்று வள்ளுவர் சொன்னது தமிழை மட்டும் நினைத்தா ..? .ஆதிபகவன் என்று அவர் சொன்னது சூரியனையா..? என்று சிந்தித்ததற்காக என்னைத் "திருக்குறளின் முதல் எதிரி" என்றே சொல்லிவிட்டார்..

ஆடம்பர வார்த்தைகள் வேண்டாம் என்றும் சொல்லியிருந்தார் ... தமிழில் எனக்குத் தெரிந்ததே சில நூறு வார்த்தைகள்.. அதிலும் ஒரு கருத்தைச் சொல்ல நினைக்கும்போது மனதில் உடனே வரும் வார்த்தைகள் மிகக் கொஞ்சம் .. இதில் அந்த நண்பர் சொல்வதுபோல் ஆடம்பர வார்த்தைகள், எளிமையான வார்த்தைகள் , மிக ஆடம்பரமான வார்த்தைகள் என்று எப்படிப் பிரித்துப் பார்ப்பது என்று தெரியவில்லை .. வல்லினம் , மெல்லினம் என்று எழுத்துப்பிரிவு இருப்பதைப்போல் ஆடம்பர வார்த்தைகள் , எளிமையான வார்த்தைகள் என்று ஏதும் பிரிவுள்ளதா என்றும் தெரியாததால், கொஞ்சம் யோசித்துவிட்டு வேறு வழியில்லாமல் வழக்கம் போலவே எழுதுவது என்ற முடிவுக்கு வந்துவிட்டேன் ..அந்த முகம் காட்டமுடியாத பண்பான நண்பர் என்னை மன்னிக்கட்டும் ..

அந்த நண்பருக்குப் பதில் சொல்வதற்காய்ச் சொல்லவில்லை ... அவரைப் போல் இன்னும் கொஞ்சப்பேர் இருக்கிறார்கள் என்பதால் பொதுவாய் என் மனதில் தோன்றியதைச் சொல்லிவிடுகிறேன் .. உளவியலில் சொல்வதைப்போல் ".... கண்ணோட்டம்தான் (perception) நிறையவற்றைத் தீர்மானிக்கிறது .. " ஏனென்றால் அனைத்தைப் பற்றியும் ஒவ்வொருவருக்கும் ஒரு கண்ணோட்டம் இருக்கும், பெரும்பாலும் இதுதான் அவர்களின் எண்ணங்களைக், கருத்துக்களைத் தீர்மானிக்கிறது .. இரண்டாயிரம் வருஷத்துக்கு முன்னால் இங்கே இருந்தவர்களுக்கு என்ன பெரிதாய்த் தெரிந்திருக்கப்போகிறது என்ற ஒரு அலட்சியம் கூட அவர்களின் கண்ணோட்டமாக இருந்திருக்கலாம்.. இரண்டு வரியை வைத்துக்கொண்டு இத்தனை வருடம் இன்னும் எத்தனை யுகத்துக்கு இப்படிப் பிதற்றுவார்கள் என்பதுபோல் இவர்கள் கேட்கும்போது இச்சந்தேகம் இன்னும் உறுதிப்படுகிறது ...

Wednesday, February 25, 2004

அகர முதல - சில சிந்தனைகள் ....!

 

அகர முதல எழுத்தெல்லாம் ஆதி
பகவன் முதற்றே உலகு.

எழுத்துக்கள் அனைத்தும் அகரத்தில் தொடங்குவதைப் போல உலக உயிர்களின் தோற்றம் ஆதிபகவனிடமிருந்து ஆரம்பிக்கிறது ..

முதல் குறளில் .. அகரத்தில் எழுத்துக்கள் ஆரம்பிப்பதைப் போல என்று குறிப்பிடுகிறார் வள்ளுவர் .. வள்ளுவர் எதையும் மிகக் குறுகிய வட்டத்தில் சொன்னதாய்த் தெரியவில்லை ... அவரின் அத்தனை சொற்களிலும் ஒரு உலகளாவிய நோக்கும் , சிந்தனையும் மிளிர்கின்றது என்பதைச் சொல்ல வேண்டியதில்லை.. ஒரு குறிப்பிட்ட மதத்தையோ, மொழியையோ, மனிதரையோ பற்றிக்குறிப்பிடாமல் இத்தனை அருமையான கருத்துக்களை அவர் சொன்னதுதானே வள்ளுவரின் வான்புகழுக்குக் காரணம் .. இன்றைக்குக் குளோபலைஷேசன் என்று நாம் சொல்வதைப் போன்று அன்றே இரண்டாயிரமாண்டுகளுக்கு முன்பு பலர் சிந்தித்திருக்கிறார்கள் என்பது மிகத் தெளிவு .. " யாதும் ஊரே.. யாவரும் கேளிர் " என்ற கணியன் பூங்குன்றனாரின் கருத்தும் இத்தகைய உலகமயமாக்கல் போன்ற ஒரு சிந்தனையின் விளைவாய் வந்ததே என்பதையும் யாரும் மறுக்க இயலாது ..

சரி.. எழுத்துக்கள் அகரத்தில் ஆரம்பிக்கிறது என்று வள்ளுவர் சொன்னது தமிழை மட்டும் நினைத்துத்தானா....? அடுத்த வரியில் உலகத்தில் உள்ள உயிர்கள் அனைத்தும் .... என்று பரந்த நோக்கில் சொல்லியிருப்பதை பார்க்கும்போது அவர் அகரம் என்று சொன்னது தமிழை மட்டும் நினைத்து என்று எண்ணத் தோன்றவில்லை .. இரண்டாயிரமாண்டுகளுக்கு முன்னர் சமஸ்கிருதமும் தமிழகத்தில் நன்கு வேரூன்றி இருந்திருக்கும். இன்று நாம் ஆங்கில வார்த்தைகளைக் கலந்து தமிழ் பேசுவதைப் போல , அல்லது இன்னும் அதிகமாகவும் இருந்திருக்கலாம் .. இரண்டாயிரமாண்டுகளுக்கு முன்னர் எழுதப்பட்ட தமிழ் நூல்களில் கூட ஆங்காங்கே காணப்படும் சில வடமொழிச்சொற்கள் இதை உணர்த்துகிறது .. சமஸ்கிருதம் , தமிழ் போன்ற வேறு சில மொழிகளும் கூட தமிழகத்திலும் , இந்தியக் கண்டத்திலும் இருந்திருக்கலாம் .. யாருக்குத் தெரியும் .. ?

இன்றைய நிலையில் உலகில் உள்ள 6000 - க்கும் மேற்பட்ட மொழிகளில் சராசரியாக ஒரு மாதத்திற்கு இரு மொழிகள் வீதம் இறந்துகொண்டிருப்பதாய் யுனெஸ்கோ கவலையுடன் சொல்கிறது .. அன்று மிக வலிமையுடன் பாரத கணடம் முழுவதும் ஆட்சி செலுத்திய சமஸ்கிருதம் ஒரு நாள் இதுபோல் இறந்த மொழியாக மாறும் என்று யாரும் கனவிலும் நினைத்திருக்கமாட்டார்கள் .. ஆக சமஸ்கிருதத்துக்கே இந்த நிலை என்றால் இதுபோல் எத்தனை மொழிகள் தமிழகத்தில் வழங்கியிருக்கும்,மறைந்திருக்கும் என்பதை அவ்வளவு எளிதாய் உறுதியாய்ச் சொல்லிவிடமுடியாது ...

சரி .. மீண்டும் விஷயத்துக்கு வருவோம் .. இந்தியாவில் அல்லது உலகில் எத்தனை மொழிகள் அகரத்தில் ஆரம்பிக்கின்றன .. ? வெகு சிலவற்றைத் தவிர கிட்டத்தட்ட அனைத்து மொழிகளும் அகரத்திலேயே ஆரம்பிக்கிறது என்பது பிரமிக்க வைக்கும் , சிந்திக்க வைக்கும் உண்மை ஆகும் .. ஏன் ஆங்கிலம் உட்பட மேலை நாட்டு மொழிகள் கூட அப்படித்தானே ஆரம்பிக்கிறது .. ? ஆங்கிலத்தில் a என்பதை "ஏ" என்று தனியாக வாசிக்கும்போது சொன்னாலும் சொல்லில் அதன் உச்சரிப்பு வடிவம் அகரம்தானே .. ? இதைவிட ஜெர்மன் போன்ற மொழிகளில் "a" - வை மிகச் சரியாக "அ" - என தமிழ் உச்சரிப்புப் போலவே உச்சரிக்கிறார்களே .. இது எப்படி.. ? இவற்றுக்கெல்லாம் ஏதோ காரணமிருக்கிறது.. உலகிலுள்ள அத்தனை மொழிகளுக்கும் இடையில் நமக்குத் தெரியாமல் மிகச் சிறிய இழையாக ஏதோ தொடர்பைக் காண முடிகிறதுது ... உண்மையில் இவ்வொற்றுமைகள் எப்படி வந்தன என்று நம்மால் உறுதியாய்ச் சொல்ல முடியவில்லை. இவ்வளவு ஏன்... தமிழுக்கும் ஆங்கிலத்துக்கும் எத்தனை அதிசயிக்கத்தக்க ஒற்றுமைகள் இருக்கின்றன .. ?

குறளின் அடுத்த வரிக்குவருவோம் உயிர்களின் தோற்றம் ஆதிபகவனில் இருந்து ஆரம்பிக்கிறது என்று சொல்லும்போது " ஆதிபகவன்" என்று வள்ளுவர் எதைக்குறிக்கிறார்.. ஆதியில் தமிழர்கள் இயற்கையையே வணங்கினர் என்று ஒரு கருத்து உண்டு .. அதனால் ஒரு வேளை சூரியனை அவ்வாறு குறிக்கிறாரோ என்று எண்ணத் தோன்றுகிறது .. ஏனென்றால் பூமியில் உள்ள அனைத்து உயிர்களும்,பொருட்களும் சூரியனிடமிருந்து வந்தவைதானே .. ? வேதத்திலும் கூட .. " பூமியிலுள்ள அனைத்துப் பொருட்களும் சூரியனிடமிருந்து வந்தவை..." என்றுதானே சொல்லப்படுகிறது .. ? அறிவியல் படியும் இதுதானே உண்மை .. முதலில் நெபுலா நெருப்புக்கோளம் பின்னர் அது சிதறி மிகப் பெரிய துண்டாக சூரியன் , மற்றவை ஒன்பது(?) கோள்களாக மாறின.. அவற்றில் ஒரு துண்டு பூமி. அது குளிர்ந்து அதிலிருந்து அமீபா போன்ற ஒரு செல் உயிலிருந்து இன்றுள்ள மனிதன் வரை வந்த கதையெல்லாம் நாம் அறிந்ததுதானே .. எனவே உயிர்களின் ஆதி சூரியன் என்பது பொருத்தம்தானே ...?

ஆக முதற்குறளிலேயே இத்தனைச் சிந்திக்க வேண்டிய விஷயங்களா.. ? திருக்குறளை நினைத்தாலே பிரமிப்பாய் இருக்கிறது ...!!




Tuesday, February 24, 2004

வணக்கமுங்க ... எல்லோருக்கும் ...

 
எல்லாருக்கும் வணக்கமுங்க ....
இங்க இன்னைக்குத்தான் வேலையில சேர்ந்திருக்கிறேன் ... எனக்கு அப்பாயிண்ட்மெண்ட் லட்டர் வருவதற்குக் கொஞ்சம் தாமதமானதாலும் , வந்த அப்பாயிண்ட்மெண்ட் கடிதத்தை நான் பார்க்கக் கொஞ்சம் தாமதமானதாலும் சில நாள் தாமதம் ஆகிவிட்டது .. பொருத்தருளவும் .. அப்புறம் .. என்னைப் பற்றிப் புதுசா சொல்றதுக்கு எதுவும் இல்லை .. மதி எல்லாத்தையும் சொல்லிட்டாங்க ..

புதிது புதிதாய் நிறைய வலைப்பூக்கள் தமிழில் பூத்துக் கொண்டிருக்கின்றன.. பார்க்க மனதுக்கு மிகவும் மகிழ்ச்சியாய் இருக்கிறது .. போன வாரங்களைப் போலவே புதிதாய்ப் பூத்த வலைப்பூக்கள் , ஏற்கனவே பூத்து பல நாட்களாய் மணம் வீசி வண்டுகளை ஈர்த்துக்கொண்டிருக்கும் பூக்கள் என்று ஒரு ரவுண்டு வரலாம் .... இது தவிர பார்த்தது , கேட்டது மற்றும் ரசித்தது என்று எல்லாத்தையும் பார்க்கலாம்.. மேலும் ... நம் வலைப்பதிவாளர்களில் பலர் குறளின் தீவிர ரசிகர்கள் என்பதால் திருக்குறள் பற்றியும் கொஞ்சம் பார்க்கலாம் ... குறளுக்கென்று தனியாக ஒரு வலைப்பூ ஆரம்பித்து அது இன்னும் ஆரம்பித்த நிலையிலேயே நிற்கிறது .. அதற்கான முதல் பதிவை இங்கிருந்தே ஆரம்பிக்கலாமா என்று ஒரு யோசனை ... சரிங்க .. முடிந்தவரை வேலைக்கு மட்டம் போடாமல் தினமும் வேலைக்கு வர முயற்சிக்கிறேன் ... அறிமுகம் சொன்ன மதி , வாழ்த்துச்சொன்ன 'சுவடு' சங்கர் , கார்த்திக் ரமாஸ் உள்ளிட்ட அனைத்து நண்பர்களுக்கும் நன்றி ..! நன்றி ....!

Monday, February 23, 2004
 


Madame Tussauds Wax Museum, NY (c)Chera & Lakshmi


 

இவ்வார எடிட்டர் மதுரையிலிருந்து வருகிறார். நேரடியாக அல்ல. திருச்சியில் வேதியியல் படித்த இவர் இப்போது வசிப்பது ஜேர்மனியில். அட! உங்களுக்கு ஜேர்மன் மொழி பேசத் தெரியுமா? என்று கேட்டதற்கு, முக்கியமான விஷயங்கள் தெரியுங்க. ஜேர்மன் மொழியில் திட்டத் தெரியும் என்றார். :)


Bochum, Germanyஇல் Organic Chemistry படிக்கும் இவருக்குப் பிடித்த விஷயங்கள் தமிழ்!, தமிழ்!, தமிழ்!, தமிழ் இலக்கியம், விஞ்ஞானம், தத்துவம். தமிழ் குறித்த விவாதக்களங்களும் குழுக்களும் பிடிக்கும் என்று சொல்லும் இவர் தமிழ் மன்றம் விவாதக்குழுவிலும் மட்டுறுத்துனராக இருக்கிறார்.

உங்களுடன், ஜேர்மனியில் இருந்து முத்து





 

Madame Tussauds Wax Museum, NY (c)Chera & Lakshmi

Sunday, February 22, 2004

பதில் மரியாதை

 
வலைப்பூ வாராந்திர ஆசிரியர் பதவி ஏற்கும் போது, பல விஷயங்களை செய்யலாம் என்று நினைத்து ஏற்றேன். தினத்துக்கு குறைந்ததும் மூன்று அஞ்சல்களாவது செய்வது. எதிர்வினைகளுக்கு அங்கங்கே உடனடியாக பதில் தந்து, சுறுசுறுப்பான ஒரு ஆசிரியர் என்று பெயர் வாங்க வேண்டும் என்று நினைத்திருந்தேன். நினைப்பில் மண். பதவி ஏற்ற இரண்டாம் நாளே, காணாமல் போய், அட்டார்னி ஜெனரல், பாய்ஸ் இயக்குனர், உஷா போன்ற நண்பர்கள் விசாரிக்கும் படி ஆகிவிட்டது. சாரி.

வலைப்பதிவு செய்யாமல் இருப்பதற்கு, இந்த யூனிகோட் பேஜார் தான் காரணம் என்ற உடனே நானிருக்கிறேன் என்று அபயம் தந்த பாய்ஸ் இயக்குனர், தேவி பாரடைஸ்லே டிக்கட் கெடைக்காட்டி, தேவிபாலா என்ற ரீதியில் , யூனிகோட் இல்லாட்டா டிஸ்கி என்று அட்வைஸ் கொடுத்த பாலாஜி, மெயில் வழியாகவோ, மயில் வழியாகவோ வலைப்பதிக்க உதவி செய்கிறேன் என்று சொன்ன சுரதா ( மயிலின் பெயர் த்ரிஷா என்றால் எனக்கு ஓகே!, சோனியா அகர்வால் என்றால் பாலாஜிக்க்கு ஒகே :-))

அனைவருக்கும் என் நன்றி.

பின் நவீனத்துவத்தைப் பற்றி புரிந்து கொள்ள வேண்டும் என்றால், ஜெயமோகன் எழுதிவற்றை படிப்பதை தவிர்க்கவும் என்று நோமேன் என்பவர் அறிவுரை செய்திருக்கிறார். அவருக்கு என் பதில் அறிவுரை, இது போன்ற மடல்களையெல்லாம், முகம் காட்டாமல் பதிவு செய்ததுதான் புத்திசாலித்தனம். அப்படியே முகம் வெளியே தெரிந்து விட்டாலும், பிரசன்னா என்ற நண்பர் பக்கதில் இல்லாமல் பார்த்துக் கொள்ளுங்கள்

கிரிக்கெட் பற்றிய விவகாரம் என்றதும் குதித்து எழுந்த பத்ரி , அதுக்கப்புறம் ஆளைக் காணோம். வெளியூர் கிளியூர் போயிருக்காரோ?

யுகபாரதியுடனான பேட்டி நன்றாக இருந்தது என்று கருத்து சொன்ன, பாரி, அருண் வைத்தியநாதன், சொற்குற்றம் கண்டுபிடித்த பத்ரி, சடாரென்று டாஸ்மாக், மெக்டோவல் நினைப்பை கிளப்பி விட்ட பரிமேலழகர் அனைவருக்கும் நன்றி.

" அய்யாங்... எனக்கு சோனியா அகர்வால் வோணும் " என்று கையை காலை உதைத்து அழும் இவருக்காக, இதோ சோனியா அகர்வால். Sonia Agarwal

வலைப்பதிவு பற்றிய விவாதத்தில் இன்னும் அதிகமான பேருக்கு ஏதாவது சொல்வதற்கு அபிப்ராயம் இருக்கும் என்று எதிர்பார்த்தேன். முத்து ஓரளவுக்கு ஒத்துப் போகிறார், பவித்ராவுக்கு நான் சொல்வதில் உடன்பாடு இல்லை.

இதைப் பற்றி, வெங்கட், தன் வலைப்பதிவில் விரிவாக எழுதி இருக்கிறார். அதற்கு பதில் சொல்லவேண்டும். சின்னதாக இருந்தால், அவருடைய எதிர் வினைப் பொட்டியில், பெருசா போச்சென்றால் என்னுடைய வலைப்பதிவில்.

உங்களுடன் இந்த வலைப்பூ மூலமாக தொடர்பு கொண்டதில் மிக்க மகிழ்ச்சி.

வாய்ப்பு கொடுத்த மதிக்கு என் நன்றி.

அன்புடன்
பிரகாஷ்


This page is powered by Blogger. Isn't yours? Feedback by backBlog Trackback by HaloScan.com